नांदुरा : प्रफुल्ल बिचारे
अज्ञात इसमाने एटीएम कार्डची अदलाबदल करून बँकेच्या एका खात्यातून दुसऱ्या खात्यात १ लाख रुपये वर्ग करून खासगी चालकास एक लाख रुपयांना गंडविल्याची घटना १७ जुलैला दुपारी १२ ते ५.३० वाजण्यादरम्यान येथील स्टेट बँक ऑफ इंडियाच्या शाखेतील एटीएममध्ये घडली. याबाबत अलमपूर येथील सुनील मारोती देशमुख (वय ३०) यांनी नांदुरा पोलीस ठाण्यात तक्रार दिली. त्यामध्ये स्टेट बँक ऑफ इंडियाच्या एटीएममधून पैसे काढण्यासाठी गेले. त्यावेळी पैसे निघाले नाही. रांगेत उभ्या असलेल्या एका अनोळखी इसमाने कार्ड टाकून पिन नंबर टाकण्याचे म्हटले. मात्र, त्यानंतरही पैसे न निघाल्याने त्याने कार्ड ब्लॉक झाल्याचे सांगितले. घरी परतल्यानंतर भ्रमणध्वनीवर दहा हजार रुपये काढल्याचा संदेश प्राप्त झाला. त्यावेळी एटीएम कार्डची पाहणी केली असता त्यावर नारायण बटवात असे लिहिलेले होते. त्यानंतर थोड्यावेळाने एकापाठोपाठ एक पैसे काढल्याचे संदेश मोबाईलवर आले. तत्काळ बँक प्रबंधकांना भेटून घडलेली घटना सांगितली. बँक खाते ब्लॉक केले तोपर्यंत अज्ञात इसमाने खात्यातून १ लाख ६ हजार रुपये काढून घेतले. याप्रकरणी नांदुरा पोलिसांनी अज्ञात व्यक्तीविरुद्ध कलम ४२० भादंवी अन्वये फसवणुकीचा गुन्हा दाखल केला. अधिक तपास स.पो.नि. विरणक करत आहेत.
