नांदुरा :- दि,23/04/2021 शहरासह तालुक्यात फार मोठ्या प्रमाणात अवैध धंदे सुरू आहे यामध्ये वरली मटका, जुगार, अवैद्य दारू यासारख्या धंद्यांचा समावेश आहे. हे धंदे तात्काळ बंद करण्यात यावे अशी तक्रार राष्ट्रीय विश्वगामी पत्रकार संघाचे विदर्भ अध्यक्ष किशोर इंगळे यांनी विभागीय पोलीस आयुक्त अमरावती तसेच जिल्हा पोलिस अधीक्षक बुलढाणा यांच्याकडे केली आहे. सदर तक्रारीच्या प्रति आज २३ एप्रिल रोजी पोस्टाद्वारे त्यांना पाठविण्यात आल्या आहेत.
दिलेल्या तक्रारीत नमूद आहे की नांदुरा शहरासह तालुक्यातील फार मोठ्या प्रमाणात अवैध धंदे चालू आहेत. यामध्ये वरली मटका, अवैद्य दारू, जुगार यासारख्या धंद्याचा समावेश आहे. मात्र नांदुरा येथील पोलिस निरीक्षक सुरेश नाईक नवरे यावर कुठल्याही प्रकारची कारवाई करीत नाही. दिनांक ६ एप्रिल २०२१ रोजी तालुक्यातील ग्राम दहिगाव येथील महिलांनी गावात सुरू असलेली अवैध दारू विक्री बंद करण्यात यावी अशा आशयाचे निवेदन ठाणेदारांना दिले होते. मात्र ठाणेदार सुरेश नाईक नवरे यांनी कुठल्याच प्रकारची दखल घेतली नाही. त्यांच्याच कृपेने तालुक्यात अवैध धंदे सुरू आहे की काय?असा प्रश्न या ठिकाणी उपस्थित होते.
तालुक्यातील वडनेर भोलजी, चांदुर बिस्वा, निमगाव, खुमगाव, दहिगाव, टाकळी वतपाळ या गावांमध्ये वरलीमटका सर्रासपणे सुरू आहे. हा धंदा करणाऱ्यांना पोलिसांचा कुठलाच धाक उरलेला नाही या अवैध धंद्यामुळे शहरी व ग्रामीण भागातील अनेक कुटुंब उध्वस्त होत आहे,तरुण पिढी व्यसनाधीन होत आहे तरी मा. महोदय सदर बाबींचा विचार करून याला जबाबदार असलेल्या संबंधित निष्क्रिय अधिकाऱ्यावर आपल्या स्तरावरून कारवाई करून नांदुरा शहरासह तालुक्यात सुरू असलेले अवैध धंदे तात्काळ बंद करावे अशी मागणी केली आहे.सदर तक्रारीच्या प्रति गृहमंत्री महाराष्ट्र राज्य मंत्रालय मुंबई, पालक मंत्री बुलढाणा, जिल्हाधिकारी बुलढाणा यांनासुद्धा पाठवण्यात आल्या आहेत.
