उषा पानसरे कार्यकारी संपादक .
मो.9921400542
अमरावती : ‘जिजाऊ बँक’ ही केवळ मराठा सेवा संघाचे संस्थापक ॲड.पुरुषोत्तम खेडेकर यांच्या संकल्पनेतून स्थापन करण्यात आली असून, सर्वसामान्य व मुख्य सामाजिक प्रवाहाबाहेरील घटकांना अर्थसत्तेत आपले स्थान निश्चित करण्याचे त्यामागील उद्दिष्ट आहे; असे प्रतिपादन मराठा सेवा संघाचे महासचिव इंजि.मधुकर मेहकरे यांनी केले. मराठा सेवा संघाच्या आढावा बैठकीमध्ये ते बोलत होते.
गुरुवारी मराठा सेवा संघाच्या सर्व कक्षांची आढावा बैठक जिजाऊ प्रतिष्ठान, मराठा नगरी, रहाटगाव येथील इंजि.सचिन चौधरी सभागृहात संपन्न झाली. यावेळी मराठा सेवा संघाच्या सर्व कक्षप्रमुखांसह जिल्ह्यातील कार्यकर्त्यांशी मराठा सेवा संघाचे महासचिव मधुकर मेहकरे यांनी संवाद साधला. यावेळी संघटनेच्या मागील दोन वर्षांचा आढावा मांडण्यात आला. याप्रसंगी मेहकरे यांनी प्रामुख्याने जिजाऊ बँकेच्या कामकाजासंबंधी सूचना केल्या. ते म्हणाले, की पुरुषोत्तम खेडेकर यांनी पुढाकार घेऊन ‘जिजाऊ बँक’ स्थापन केली. सर्वसामान्य बहुजनांना अर्थसत्तेकडे नेण्याचा त्यामागील एकमेव उद्देश आहे. त्यामुळे बँकेचा कारभार सुरळीत व व्यवस्थित चालावा, अशा सूचना जिजाऊ बँकेच्या संचालकांना त्यांनी यावेळी दिल्या. आढावा बैठकीला मराठा सेवा संघाचे प्रदेश उपाध्यक्ष इंजि.अरविंद गावंडे, मराठा उद्योजक कक्षाचे राज्याचे सचिव शिवाजीराव झोंबाडे, जिजाऊ ब्रिगेड चे राज्य पदाधिकारी कीर्ती माला चौधरी , सीमा ताई बोके जिल्हा अध्यक्ष, मनाली तायडे .मराठा सेवा संघाचे जिल्हाध्यक्ष अश्विन चौधरी, जिल्हा सचिव संजय ठाकरे, जिल्हा प्रवक्ता चंद्रकांत मोहिते, संगीतसूर्य केशवराव भोसले सांस्कृतिक परिषदेचे जिल्हाध्यक्ष भोजराज चौधरी, शिक्षणमहर्षी डॉ.पंजाबराव देशमुख शिक्षक परिषदेचे प्रदेशाध्यक्ष प्रभाकर झोड, जिजाऊ बँकेचे अध्यक्ष अविनाश कोठाळे, संभाजी ब्रिगेडचे जिल्हाध्यक्ष शुभम शेरकर, वीर भगतसिंग विद्यार्थी परिषदेचे डॉ.तुषार देशमुख, यांच्यासह अनेक पदाधिकारी व कार्यकर्ते उपस्थित होते.
