गजानन सोनटक्के
जळगांव(जामोद):दि.२५ कोरोना सदृश्य परिस्थिती मध्ये सध्या प्राथमिक शाळा बंद असून विद्यार्थ्यांचे अभ्यासापासून लक्ष विचलित होऊ नये म्हणून विद्यार्थ्यांना अभ्यासाची निरंतर ओढ लागावी, यासाठी आकाशवाणी नागपूर आणि विद्या प्राधिकरण नागपूर यांच्या संयुक्त विद्यमाने “शाळेबाहेर ची शाळा”हा एक नाविन्यपूर्ण उपक्रम सुरु करण्यात आलेला आहे. तालुक्यातील निंभोरा बु. येथील जि.प. प्राथमिक शाळेची विद्यार्थिनी कु. आरती सुरळकर हिची ह्या उपक्रमासाठी आकाशवाणी केंद्राने मुलाखत घेऊन प्रसारित केल्याने ह्या शाळेने व कु.आरतीने आकाशवाणी वर झेप घेतली आहे.आरतीने कार्यक्रमात आपला सहभाग नोंदवून सर्वांच्या कौतुकास पात्र ठरली.
नागपूर आकाशवाणी च्या अ केंद्रावरून शाळे बाहेरची शाळा हा कार्यक्रम आठवड्यातून मंगळवार, गुरुवार आणि शनिवार असे तीन दिवस सकाळी साडेदहा वाजता प्रसारित करण्यात येत असतो. कु.आरती व सुरडकार हिने “बँका मुळे तुम्हाला काय फायदा” ह्या विषयावर ह्या कार्यक्रमाच्या माध्यमातून संवाद साधला. तिचे वडील विठ्ठल सुरडकार यांनी सुद्धा ह्या कार्यक्रमात आपला सहभाग नोंदविला. कु. आरती ही इयत्ता सहावी ची विद्यार्थिनी असून तिचा अभ्यास ती गटामध्ये पूर्ण करते. शाळेबाहेर ची शाळा ह्या उपक्रमात १३२ व्या भागांमध्ये कु. आरती चा सहभाग असलेला कार्यक्रम प्रसारित करण्यात आला. कु. आरती सुरडकर हिच्या प्रतिसादाबद्दल तिचे सर्वत्र कौतुक होत आहे. पंचायत समितीचे गटशिक्षणाधिकारी एन.जी.फाळके, गटसमन्वयक एम.आर.इंगळे, शिक्षण विस्तार अधिकारी आर.पी.तायडे, केंद्रप्रमुख योगेश वाघ, ह्या उपक्रमाचे तालुका समन्वयक किशोर शास्त्रकार, शाळेच्या मुख्याध्यापिका सौ.अर्चना सपकाळ ,सहयोगी शिक्षक संदीप इंगळें, मनोज वाकडे ,गोविंद बोरुडे यांच्यासह ग्रामपंचायत व ग्रामस्थांनी कु. आरतीचे कौतुक आणि अभिनंदन केले आहे. सध्या कोरोनाचा भयंकर असा संक्रमण काळ आहे. विद्यार्थ्यांनी विनाकारण कुठेही न फिरता घरात राहूनच अभ्यासाकडे लक्ष केंद्रित करावे, तसेच”शाळा बाहेरची शाळा” अश्या अभिनव उपक्रमांमध्ये सहभाग नोंदवून आपल्या वेळेचा सदुपयोग करून घ्यावा, असे आवाहन शाळेच्या मुख्याध्यापिका सौ.अर्चना सपकाळ यांनी विद्यार्थ्यांना केले आहे.
