गजानन सोनटक्के
जळगांव जा.प्रतिनिधी
दि 14: जळगाव जामोद वनपरिक्षेत्र नेहमीच वादाच्या भोवऱ्यात असते,आता येथे कार्यरत असलेले वनपरिक्षेत्र अधिकारी बी.डी. कटारिया यांना 25 हजारांची लाच स्वीकारताना बुलडाणा एसीबीच्या पथकाने दिनांक 13 मेच्या सायंकाळी 7 वाजेच्या सुमारास त्यांच्या कार्यालयातच रंगेहात पकडले आहे. सदर एसीबीच्या कारवाईमुळे संपूर्ण वन विभाग हादरुन गेला आहे. वनपरिक्षेत्र अधिकारी भगतराम द्वारकादास कटारिया वय 47 वर्ष यांच्याविरोधात पंचगव्हाण येथील 32 वर्षीय इसमाने लाचेची मागणी केल्याची तक्रार केल्यामुळे ही कारवाई करण्यात आली यातील तक्रारदार यांच्या मालकीचे टाटा 709 वाहन दि 10 मे रोजी लाकुड वाहतूक करताना मिळून आल्याने वनविभागाचे कर्मचारी देवकर यांनी वाहन वनपरिक्षेत्र कार्यालय जळगाव जामोद येथे जमा केले होते. तक्रारदार यांनी वाहन सोडविण्याकरिता वनपरिक्षेत्र अधिकारी कटारीया यांची भेट घेतली असता कटारिया यांनी स्वतःसाठी 7 हजार रुपये व इतरांना 12 हजार व दंडाची रक्कम 6 हजार अशी एकूण 25 हजार रुपयांची मागणी केली. त्याबाबत तक्रारदार यांनी लाचलुचपत प्रतिबंधक विभाग बुलढाणा येथे तक्रार दिल्यानंतर पडताळणी दरम्यान लाच मागणी बाबत खात्री करण्यात आली सापळा कारवाईदरम्यान वनपरिक्षेत्र अधिकारी कटारीया यांना लाचेची रक्कम 19000 व दंड सहा हजार एकूण पंचवीस हजार रुपयांची रक्कम स्वीकारताना रंगेहाथ पकडण्यात आले. सदर वनपरिक्षेत्र अधिकारी यांना लाचलुचपत प्रतिबंधक विभागाने अटक करून त्यांच्याविरोधात गुन्हा दाखल करण्यात आला आहे. सदर कारवाई विशाल गायकवाड पोलीस अधीक्षक लाचलुचपत प्रतिबंधक विभाग अमरावती परिक्षेत्र अमरावती, देविदास घेवारे, अरुण सावंत अप्पर पोलीस अधीक्षक लाच लुचपत प्रतिबंधक विभाग अमरावती ,यांच्या मार्गदर्शनाखाली ही कारवाई, एस एन चौधरी पोलीस उप अधीक्षक लाचलुचपत प्रतिबंधक विभाग बुलढाणा, पोलीस हेडकॉन्स्टेबल विलास साखरे, पोलीस नाईक मोहम्मद रिजवान, रवींद्र दळवी, प्रवीण बैरागी, पोलीस शिपाई अझरूद्दिन काझी,चालक अर्शद शेख यांनी ही कारवाई यशस्वी रित्या पूर्ण केली. सदर आरोपी कटारिया यांना जळगाव जामोद पोलिसांच्या ताब्यात देण्यात आले असून पुढील तपास सुरू आहे.
