सावरगाव नेहु येथील प्रकार
सुनील पवार. नांदुरा
सरपंचाची खोटी सही करून एका लाभार्थ्यांचे पंतप्रधान आवास योजनेतून नाव गहाळ केल्याचा प्रकार तालुक्यातील सावरगाव नेहू येथे घडला आहे. याबाबत सुरेश तुळशीराम खराटे सावरगाव नेहु यांनी गटविकास अधिकारी नांदुरा यांच्याकडे लेखी तक्रार दाखल केली आहे.
याबाबत सविस्तर वृत्त असे की, सावरगाव नेहु येथील सुरेश तुळशीराम खराटे या अतिशय गरीब असलेल्या नागरिकांचे नाव सन 2017 18 मध्ये पंतप्रधान आवास योजनेच्या प्रपत्र ब मध्ये पात्र यादी मध्ये समाविष्ट होते. मात्र तत्कालीन ग्रामसेवक डी.एस. गाडे यांनी मुद्दाम खोडसाळपणा करून ग्रामपंचायतचा दिनांक 19 नोव्हेंबर 2018 रोजी चा खोटा ठराव तयार करून सरपंच सौ वंदनाबाई प्रकाश पांडे यांची खोटी सही करून लाभार्थ्यांचे नाव पात्र यादीतून काढून अपात्र केले परंतु सदर तारखे मध्ये ग्रामपंचायत मध्ये कोणताच ठराव घेण्यात आला नसल्याचे सरपंच यांनी सांगितले त्यामुळे हा प्रकार उघड झाला आहे.
हा लाभार्थी गेल्या अनेक वर्षापासून याच गावात वास्तव्यात आहे त्यांचा जन्म सुद्धा याच गावात झालेला आहे परंतु ग्रामसेवक यांनी गावात राहत नसल्याच्या कारणावरून त्यांचे नाव व प्रपत्र-ब मधून काढून टाकले आहे. याबाबत सरपंच यांना विचारणा केली असता त्यांनी सुद्धा माझी खोटी सही करून हा प्रकार केला असल्याचे सांगितले आहे व तशी लेखी तक्रार गटविकास अधिकारी नांदुरा यांच्याकडे केली आहे व ग्रामसेवक डी.एस.गाडे यांच्यावर कारवाईची मागणी केली आहे तर घरकुल लाभार्थी सुरेश तुळशीराम खराटे यांनी ग्रामसेवकावर 420 चा गुन्हा दाखल करण्याची मागणी केली आहे. आता या प्रकरणी वरिष्ठ अधिकारी काय भूमिका घेणार याकडे सर्वांचे लक्ष लागले आहे.
