SURYA MARATHI NEWS
तुपकरांच्या अन्नत्याग आंदोलनाला हिंसक वळण
गेल्या तीन दिवसांपासून सुरु असलेले तुपकरांचे अन्नत्याग आंदोलन चिघळले आहे. प्रशासनाकडून अंादोलनाची कुठलीच दखल घेतली जात नसल्याने तुपकरांच्या समर्थक कार्यकर्त्यांनी थोड्या वेळापूर्वी (संध्याकाळी ६ वाजेदरम्यान) पोलिसांची गाडी फोडली. तर त्यापूर्वी शेख रफिक या पदाधिकार्‍याने अंगावर डिझेल घेवून आत्मदहनाचा प्रयत्न केला. पोलिसांनी वेळीच रोखल्यामुळे रफिक यांचा आत्मदहनाचा प्रयत्न अयशस्वी राहिला. परंतु त्यानंतर मात्र कार्यकर्त्यांचा संयम सुटला. काही कार्यकर्त्यांनी येथील चिखली रोड बंद केला. रस्त्यावर बसून प्रशासनाविरोधात घोषणाबाजी करण्यात आली. यादरम्यान पोलिसांनी कार्यकर्त्यांना समजाविण्याचा प्रयत्न केला असता कुणीतरी कार्यकर्त्याने पोलिसांची गाडी फोडली. तर रफिक यांना घेण्यासाठी आलेली ऍम्बुलन्सही फोडण्यात आली. ‘जिल्हाधिकारी अद्यापही चर्चेसाठी का आले नाहीत ? प्रशासन अजूनही सोयाबीन-कापूस प्रश्‍नी सरकारला आंदोलनाबाबत का माहिती देत नाही ?’, असा सवाल तुपकरांनी केला आहे. विशेष म्हणजे यावेळी आंदोलनमंडपातून तुपकरही रस्त्यावर आले होते. ‘माझ्या अंगावर गाडी घाला.. मला मारून टाका’, या शब्दांत ते आक्रोश व्यक्त करीत होते.
Surya marathi news
