सिंदखेड राजा ( विशेष प्रतिनिधी )
प्राथमिक आरोग्य केंद्रात आठ दिवसांत १२८ कोरोना पाॅझिटीव्ह रुग्न आढळून आले आहेत . तरीही साखरखेर्डा येथील कोव्हीड सेंटरचा प्रश्न स्मरण पत्राच्या फाईल मध्येच अडल्याने तो प्रश्न तंत्काळ निकाली काढावा अशी मागणी होवू लागली आहे .
साखरखेर्डा गावाची लोकसंख्या २० हजार असून परीसरातील २३ खेडी या प्राथमिक आरोग्य केंद्रा अंतर्गत येतात . कोरोना संसर्गजन्य आजार रोखण्यासाठी गावातील आणि परिसरातील शेकडो नागरिक , महिला आपली कोरोना तपासणी करण्यासाठी प्राथमिक आरोग्य केंद्रात येत आहे . गेल्या सोमवार पासून आर टी पी सी आर च्या ११६ तर रॅपीड तपासणी केली असता १६ रुग्ण कोरोना पाॅझिटीव्ह आढळून आले आहेत . हा आकडा साखरखेर्ड्यासाठी खुपचं मोठा असून जिल्हा शल्य चिकित्सक डॉ तडस यांनी तत्काळ दखल घेऊन साखरखेर्डा येथे कोव्हीड सेंटर सुरु करावे अशी मागणी सर्व स्तरातून होवू लागली आहे .
साखरखेर्डा येथे कोव्हीड सेंटर सुरू करावे यासाठी स्थानिक राजकीय नेत्यांनी पालकमंत्री डॉ राजेंद्र शिंगणे यांच्याकडे मागील आठवड्यात मागणी केली होती . सहकार विद्या मंदिराची इमारत कोव्हीड सेंटर साठी उपयूक्त असल्याचा अहवाल तहसीलदार सुनील सावंत , तालुका वैद्यकीय अधिकारी डॉ .रविंद्र साळवे यांनी दिला होता . ५० खाटाचे कोव्हीड सेंटर सुरु करण्यासाठी जिल्हा शल्य चिकित्सक डॉ तडस यांच्याकडे अहवाल पाठविण्यात आला होता . परंतू या अहवालाची फाईल आजही त्यांच्याकडे पडून असून आज स्मरण पत्र दिल्याचे जबाबदार अधिकाऱ्यांकडून माहिती मिळाली आहे . साखरखेर्डा येथील आणि परिसरातील वाढती रुग्ण संख्या पाहता एक चिंतनाचा विषय ठरत आहे . केवळ पत्रावर पत्र देऊन प्रश्न सोडवू ! या आश्वासनावर ताटकळत न ठेवता युद्ध पातळीवर कोव्हीड सेंटरचा प्रश्न निकाली काढावा . अन्यथा यासाठी पालक मंत्र्यांनाच अधिकाऱ्यांना स्मरण पत्र देण्याची वेळ येवू देवू नये अशा संतप्त प्रतिक्रिया जनतेतून उमटत आहेत .
————————————————
साखरखेर्डा येथील कोरोना रुग्णांचा प्रश्न अत्यंत गंभिर विषय असून वरीष्ठ अधिकाऱ्यांनी कोव्हीड सेंटर तत्काळ सुरु करावे .
राजेश ठोके ,
माजी सभापती
———————————————–
कोव्हिड सेंटर साठी कर्मचारी नियुक्त करावे लागत असल्याने ती प्रक्रीया दोन दिवसात मार्गी लागेल . आणि कोव्हीड सेंटर सुरु करण्यात येईल .
सुनिल सावंत
तहसिलदार , सिंदखेडराजा
———————————————–
सर्व अधिकाऱ्यांची बैठक घेण्यात आली असून याची माहिती जिल्हा शल्य चिकित्सक यांना पाठविण्यात आली आहे .
* डॉ . सदानंद बनसोड
तालुका वैद्यकीय अधिकारी , सिंदखेडराजा
