यावल प्रतिनिधी : विकी वानखेडे

यावल तालुक्यातील हिंगोणा येथे आज सकाळी सुमारे आठ वाजण्याच्या सुमारास प्राथमिक आरोग्य केंद्राजवळ घडलेल्या रक्तरंजित चाकू हल्ल्याने संपूर्ण तालुका हादरला आहे. नागरिकांची वर्दळ सुरू असतानाच घडलेल्या या घटनेत प्रथमेश मुकेश महाले (वय अंदाजे २२) यांचा दुर्दैवी मृत्यू झाला असून तिघेजण जखमी झाले आहेत.

किरकोळ वादाचे भीषण रूप? प्राथमिक माहितीनुसार, एखाद्या किरकोळ वादातून हा प्रकार घडल्याचा संशय व्यक्त केला जात आहे. एका अल्पवयीन आरोपीने प्रथमेश महाले यांच्यावर धारदार चाकूने अचानक हल्ला केला. आरोपीने त्यांच्या छातीवर व पोटावर सपासप वार केल्याने ते जागीच कोसळले. घटनेनंतर परिसरात एकच गोंधळ उडाला.

रुग्णालयात नेत असताना मृत्यू उपस्थित नागरिकांनी तात्काळ प्रथमेश यांना उपचारासाठी हलविण्याचा प्रयत्न केला. मात्र छाती व पोटावर खोल जखमा झाल्याने मोठ्या प्रमाणात रक्तस्राव झाला होता. रुग्णालयात पोहोचण्यापूर्वीच त्यांची प्रकृती अधिकच खालावली आणि रस्त्यातच त्यांचा मृत्यू झाल्याचे वैद्यकीय अधिकाऱ्यांनी स्पष्ट केले. सावदा येथील वैद्यकीय अधिकारी डॉ. सचिन पाटील यांनी तपासणी करून प्रथमेश महाले यांना मृत घोषित केले.

मध्यस्थी करणारेही जखमी दरम्यान, वाद सोडविण्यासाठी पुढे सरसावलेल्या रीना रोहित गजरे, मोहित राजेंद्र गजरे व निखिल राजेंद्र गजरे यांनाही आरोपीने चाकूने जखमी केले. त्यांच्या हातावर व शरीराच्या इतर भागांवर वार झाल्याची माहिती आहे. तिघांवर जळगाव येथील रुग्णालयात उपचार सुरू असून त्यांची प्रकृती स्थिर असल्याचे सांगण्यात येत आहे.

पोलिसांची धाव, तणावाचे वातावरण घटनेची माहिती मिळताच पोलिसांनी तातडीने घटनास्थळी धाव घेत पंचनामा केला. काही काळ परिसरात तणावाचे वातावरण निर्माण झाले होते. नागरिकांमध्ये भीतीचे सावट पसरले असून दिवसा ढवळ्या आरोग्य केंद्रासमोर अशी घटना घडल्याने सुरक्षेचा प्रश्न उपस्थित झाला आहे.

या प्रकरणी गुन्ह्याची नोंद फैजपूर पोलीस स्टेशन येथे करण्यात आली असून पुढील तपास सुरू आहे. आरोपीचा शोध घेण्यासाठी पोलिसांची पथके कार्यरत आहेत. अल्पवयीन आरोपी असल्याने पुढील कायदेशीर कारवाई किशोर न्याय कायद्यानुसार होण्याची शक्यता आहे.

Yavalnews /नेमके कारण अद्याप अस्पष्ट हल्ल्यामागील नेमके कारण काय, पूर्वीपासून काही वाद किंवा वैमनस्य होते का, याबाबत पोलिसांकडून सखोल तपास सुरू आहे. अधिकृत तपास पूर्ण झाल्यानंतरच घटनेचे संपूर्ण कारण स्पष्ट होणार आहे.

विकी वानखेडे यावल

चुंचाळे विद्यालयात गुणवंत विद्यार्थ्यांचा गौरव; स्व. लतिका सोनवणे यांच्या स्मृतीनिमित्त उपक्रम

चुंचाळे (ता. यावल) | प्रतिनिधी

ग्रामीण भागातील विद्यार्थ्यांनी आयुष्यात मोठी स्वप्ने पाहिली पाहिजेत आणि ती साकार करण्यासाठी प्रचंड मेहनत घेतली पाहिजे. ग्रामीण भागात शैक्षणिक सुविधा मिळवताना अनेक अडचणी येतात, मात्र या अडचणींवर मात करून योग्य पात्रता धारण करण्यासाठी केवळ अभ्यासाचाच मार्ग स्वीकारावा लागेल. प्रामाणिक कष्टाचे फळ नक्कीच मिळते, असे प्रतिपादन यावल तालुक्याचे गटशिक्षणाधिकारी विश्वनाथ धनके यांनी केले.

येथील श्री समर्थ रघुनाथबाबा माध्यमिक व उच्च माध्यमिक विद्यालय येथे आयोजित विद्यार्थी गुणगौरव सोहळ्यात ते मुख्य मार्गदर्शक म्हणून बोलत होते.

आईच्या स्मृती जपण्यासाठी अनोखा सन्मान

विद्यालयातील उपक्रमशील शिक्षक प्रशांत सोनवणे यांनी आपल्या मातोश्री स्व. लतिका सुरेश सोनवणे यांच्या स्मृती प्रीत्यर्थ एक प्रेरणादायी उपक्रम राबवला. विद्यालयातील इयत्ता ५ वी ते १२ वी पर्यंतच्या वर्गातील प्रथम क्रमांक मिळवणारे आणि विविध स्पर्धा परीक्षांमध्ये पात्र ठरलेल्या एकूण २५ गुणवंत विद्यार्थ्यांना बक्षीस देऊन प्रोत्साहित केले.

या कार्यक्रमाचे विशेष वैशिष्ट्य म्हणजे, यशस्वी विद्यार्थ्यांसोबतच त्यांच्या आई-वडिलांचाही यावेळी गौरव करण्यात आला. सर्व विद्यार्थ्यांना मान्यवरांच्या हस्ते रोख रक्कम, सन्मानचिन्ह (ट्रॉफी) आणि प्रमाणपत्र देऊन सन्मानित करण्यात आले.

मोबाईलचा मोह टाळा; मान्यवरांचे मार्गदर्शन

• प्रमोद राणेराजपूत (समाज कल्याण उपायुक्त): “विद्यार्थ्यांनी स्वप्न पाहून ध्येय निश्चित करावे. मोबाईलवरील रिल्स पाहण्यात वेळ वाया घालवण्यापेक्षा त्याचा चांगल्या कामासाठी वापर करा. मी पुस्तकांशी मैत्री केल्यामुळेच आज हे यश मिळवू शकलो.”

• प्रमोद वाघ (सपोनि, अडावद): “मुलांनी गट (Group) करून अभ्यास करावा. पालकांनी आपल्या पाल्यांमध्ये जिद्द निर्माण करण्याकडे लक्ष दिले पाहिजे.” यावेळी त्यांनी विद्यार्थ्यांना कायद्याबाबतही मार्गदर्शन केले.

• विनायक तेली (सेवानिवृत्त प्राचार्य): यांनी विद्यार्थ्यांना आयुष्यात शिस्तीचे महत्त्व किती मोठे आहे, यावर मोलाचे मार्गदर्शन केले.

मान्यवरांची उपस्थिती

कार्यक्रमाच्या अध्यक्षस्थानी संस्थेचे अध्यक्ष सुरेश चौधरी होते. यावेळी व्यासपीठावर सचिव जगन्नाथ कोळी, प्राचार्य देविदास मोरे, सेवानिवृत्त प्राचार्य विनायक तेली, गटशिक्षणाधिकारी विश्वनाथ धनके, सहाय्यक पोलीस निरीक्षक प्रमोद वाघ, नवनियुक्त उपायुक्त प्रमोद राणेराजपूत आदि मान्यवर उपस्थित होते.

Yavalnews /कार्यक्रमाचे सूत्रसंचालन उपशिक्षक संजय गोसावी यांनी केले, तर आभार सुनील पाटील यांनी मानले. या सोहळ्याच्या यशस्वीतेसाठी विद्यालयातील सर्व शिक्षक, शिक्षिका आणि कर्मचारी वृदांने विशेष परिश्रम घेतले. कार्यक्रमाला चुंचाळे परिसरातील पालक, ग्रामस्थ व माजी विद्यार्थी मोठ्या संख्येने उपस्थित होते.