बाळापूर :- पारस – निमकर्दा मार्गावर वाटमारी करणाऱ्या टोळीतील चार युवकांना उरळ पोलिसांनी काल रविवारी बारा तासाच्या आत गजाआड केले. अटक करण्यात आलेले सर्व आरोपी पारस येथील आहेत. गुरुवार ता. २२ एप्रिल रोजी रस्त्याने पायी जाणाऱ्या हातरुण येथील ६२ वर्षीय इसमास अज्ञात युवकांनी अडवूण मारहाण करत ४५ हजार रुपयांनी लुटले होते.
बाळापूर पोलिसांच्या हद्दीत येणाऱ्या पारस रेल्वे फाटका जवळ हि घटना घडली होती.
प्राप्त माहितीनुसार हातरुण येथील मुरलीधर अनंत गायकवाड हा ६२ वर्षीय इसम गुरुवारी पारस येथील स्टेट बँकेत घरकुलाच्या दुसऱ्या हप्त्यासाठी आला होता. सायंकाळच्या सुमारास त्याने बँकेतून ४५ हजार रुपये काढून तो निमकर्दा मार्गाने पायी निघाला होता. यावेळी काही अज्ञात युवकांनी त्याचा पाठलाग केला. पारस रेल्वे फाटका जवळ सदर इसम पोहोचताच चौघे जणांनी त्याला अडवले व मारहाण करून चाकूच्या धाकावर खिशातील ४५ हजार रुपये लुटले. मारहाणीत मुरलीधर गायकवाड हा इसम गंभीर जखमी झाला. त्यामुळे काल रविवारी ता. २५ रोजी उरळ पोलिस स्टेशन गाठत त्याने पोलिसांना घटनेची माहिती कथन केली. ठाणेदार अनंतराव वडतकार यांनी क्षणाचा विलंब न लावता आपले पोलिस कर्मचारी पारस येथे रवाना केले. प्रथम स्टेट बँकेशी संपर्क साधून मुरलीधर गायकवाड याने ४५ हजार रुपये काढल्याची खात्री केली.
सीसीटीव्हीच्या आधारे घेतला आरोपींचा शोध
उरळ पोलिसांनी आपले कसब पणाला लावून स्टेट बँके पासून निमकर्दा मार्गावरील सीसीटीव्ही फुटेजची पाहणी केली. फुटेज मध्ये सदर युवक पारस येथील असल्याचे निष्पन्न झाले. त्यावरून एका युवकाला ताब्यात घेतले. सदर आरोपीस गुन्ह्याबाबत विचारणा केली असता, त्याने प्रथम उडवाउडवीचे उत्तरे दिली. परंतु, पोलिसी खाक्या दाखवताच त्याने सदर गुन्ह्यात सहभागी असलेल्या इतर तिघांची नावे सांगितली. यामध्ये आशिष बाबुराव खंडारे, राहुल बाबुराव भगत, अक्षय दादाराव खंडारे व अनिल आनंद घोगले सर्व रा. पारस हि वाटमारी करणाऱ्या आरोपींची नावे समोर आली. या आरोपींवर यापुर्वी बाळापूर पोलिस ठाण्यात गुन्हे दाखल असल्याचे पोलिसांनी सांगितले.
आरोपी बाळापूर पोलिसांच्या स्वाधीन
वाटमारीची घटना बाळापूर पोलिसांच्या हद्दीत येत असल्याने
उरळ पोलिसांनी सदर आरोपींना अटक करून बाळापूर पोलिसांच्या ताब्यात दिले. उरळ पोलिस ठाण्याचे ठाणेदार अनंतराव वडतकार यांच्या मार्गदर्शनात सहा. पोलिस उपनिरीक्षक बचे, रवी हिंगणे, जयेश शिंगणारे यांनी हि कामगिरी केली. पुढील तपास बाळापूर पोलिस करत आहेत.
