सतीश मुलंगे लोणार प्रतिनिधि
पीक पाहणी मोबाईल अॅपच्या साहाय्याने सर्व खातेदार शेतकरी तलाठ्याकडे न जाता आपल्या स्वतःच्या मोबाईल वरून आपल्या ७/१२ वर विविध पिकांची नोंदणी करता येणे शक्य झाले आहे . महसूल विभागाचा ई – पीक नोंदणी प्रकल्प हा १५ ऑगस्टपासून महाराष्ट्रात राज्यभर राबविण्यात येत आहे . सध्या रब्बी हंगामाच्या पीक पाहणीची कार्यवाही सुरु आहे . रब्बी हंगामाच्या पीक पाहणीच्या नोंदी साठी ई – पीक पाहणी चे अपडेटेड व्हर्जन गूगल प्ले स्टोअर वर उपलब्ध करून दिले आहे . सर्व खातेदार शेतकरी यांनी नवीन व्हर्जन अपडेट करून घेणे आवश्यक आहे . रबी हंगामाच्या प्रत्यक्ष ई – पीक पाहणी मोबाईल अॅपद्वारे पीक पाहणी करण्यासाठी १५ फेब्रुवारी हि अंतिम तारीख निश्चित करून देण्यात आली होती . राज्याच्या काही भागात कोरोना महामारी व उशिराच्या मान्सूनमुळे शेतकर्यांना आपली पीक पाहणी पूर्ण करता आली नाही याचा विचार करून जमाबंदी आयुक्त यांचे अध्यक्षतेखाली पार पडलेल्या राज्यस्थरीय अंमलबजावणी समितीच्या दिनांक १५ फेब्रुवारी रोजीच्या बैठकीत , ई – पीक पाहणी मोबाईल अॅप द्वारे शेतकरी स्तरावरील पिक पाहणीची कालमर्यादा १५ फेब्रुवारी वरून २८ फेब्रुवारी २०२२ पर्यंत वाढविण्याचा निर्णय घेण्यात आला आहे . लोणार तालुक्यातील सर्व शेतकरी बांधवांनी रबी हंगाम २०२२ ची पीक पाहणी वाढीव मुदतीत म्हणजेच दिनांक २८ फेब्रुवारी पर्यंत ई – पीक पाहणी मोबाईल अॅप द्वारे आपली पीक पाहणी नोंदणी पूर्ण करावी असे आवाहन तहसीलदार सैपन नदाफ यांनी १६ फेब्रुवारी रोजी केले आहे.
