Breakingnews /७९ वर्षीय वृद्धाच्या घरात घुसून कर्मचाऱ्यांची मुजोरी? बुरकोणी ग्रामपंचायतीविरोधात शंकर आष्टनकर यांचे BDO कडे प्रथम अपील
प्रतिनिधी सचिन वाघे हिंगणघाट :
हिंगणघाट तालुक्यातील बुरकोणी येथे ग्रामपंचायतीच्या कारभारावर गंभीर प्रश्नचिन्ह निर्माण करणारी घटना समोर आली आहे. माहिती अधिकारांतर्गत माहिती मागणाऱ्या ७९ वर्षीय ज्येष्ठ नागरिक शंकर धोंडबाजी आष्टनकर यांनी गट विकास अधिकारी (BDO) यांच्याकडे प्रथम अपील दाखल केले आहे.
आष्टनकर यांनी ग्रामपंचायतीच्या मागील पाच वर्षांतील ऑडिट रिपोर्ट, कॅश बुक व बँक स्टेटमेंट यांची माहिती मागवली होती. त्यासाठी त्यांनी २,०४४ रुपये शुल्कही भरले. मात्र, मिळालेली माहिती अपूर्ण व अप्रमाणित असल्याचा आरोप त्यांनी केला आहे.
तसेच, १४ एप्रिल रोजी (सुट्टीच्या दिवशी) ग्रामपंचायतीचे काही कर्मचारी कोणतीही पूर्वपरवानगी न घेता त्यांच्या घरी आल्याचा दावा आष्टनकर यांनी केला आहे. यावेळी संबंधितांनी कागदपत्रे समोर ठेवली व संमतीशिवाय छायाचित्रे काढल्याचा आरोप करण्यात आला आहे. या घटनेमुळे त्यांच्या गोपनीयतेचा भंग झाल्याची भावना त्यांनी व्यक्त केली आहे.hingnghatnews
या प्रकरणात आष्टनकर यांनी आणखी एक गंभीर मुद्दा उपस्थित केला आहे. गावातील एक रस्ता सार्वजनिक वापराऐवजी माजी सरपंचांच्या खासगी जागेकडे वळवण्यात आल्याचा आरोप असून, तो वनविभागाच्या जागेत येत असल्याचा संशयही व्यक्त करण्यात आला आहे. त्यामुळे सार्वजनिक निधीच्या वापराबाबत प्रश्न उपस्थित होत आहेत.wardhanews
आष्टनकर यांनी संबंधित कर्मचाऱ्यांवर कारवाई, प्रकरणाची सखोल चौकशी, तसेच संपूर्ण माहिती विनामूल्य देण्याची मागणी केली आहे. या प्रकरणावर गट विकास अधिकारी काय निर्णय घेतात, याकडे लक्ष लागले आहे.“न्याय न मिळाल्यास पुढील आंदोलन छेडण्यात येईल,” असा इशारा आष्टनकर यांनी दिला आहे.
