प्रतिनिधी सचिन वाघे

हिंगणघाट:- हिंगणघाट नगरपरिषद निवडणुकीच्या रणधुमाळीला आता खऱ्या अर्थाने सुरुवात झाली आहे. उमेदवारी अर्ज भरण्याची तारीख जवळ आली असून, सर्वच पक्षांमध्ये नगराध्यक्षपदाच्या उमेदवारीवरून चुरस निर्माण झाली आहे. मात्र यंदा नगराध्यक्षपद सर्वसाधारण महिलेसाठी आरक्षित असल्याने, या निवडणुकीचे रूप वेगळे झाले आहे.

पण, ज्या प्रकारे काही महिला उमेदवारांच्या नावांचा उल्लेख होत आहे, त्यावरून एक प्रश्न सरळपणे डोळ्यांसमोर उभा राहतो — उमेदवार पत्नी की कारभारी पती?
सामाजिक किंवा राजकीय क्षेत्राशी फारसा संबंध नसलेल्या, पक्षसंघटनेच्या कार्यात पाऊलही न ठेवलेल्या काही महिला आज उमेदवारीसाठी पुढे येत आहेत. मात्र, त्यामागे त्यांचे पतीच प्रमुख सूत्रधार असल्याचे उघड आहे.

पतींच्या राजकीय पुण्याईवर पत्नींना उमेदवारी मिळावी, अशी मागणी काही ठिकाणी उघडपणे होत आहे. ही परिस्थिती हिंगणघाटच्या राजकारणात चिंतनास पात्र आहे.

‘नाव तिचं, काम त्याचं’ ही प्रवृत्ती पुन्हा डोकावते आहे. आरक्षण महिलांसाठी असले तरी, प्रत्यक्षात सत्तेची लगाम पतींच्या हातातच राहणार हे चित्र जनतेलाही चांगले समजले आहे.

नगराध्यक्षपदाचे राजकारण हे जनसेवेसाठी असते, कौटुंबिक वारसदारीसाठी नव्हे, हे उमेदवार आणि पक्षश्रेष्ठींनी लक्षात ठेवावे.
या निवडणुकीत मतदारही अधिक सजग झाले आहेत. “पतीदेवांच्या छायेत असलेली नामधारी नगराध्यक्षा नव्हे, तर स्वतःच्या कर्तृत्वावर उभ्या राहिलेल्या महिला हव्याच,” असा सूर सामान्य जनतेत उमटताना दिसतो आहे.

Wardhanews /हिंगणघाटच्या राजकारणात या वेळचा निकाल केवळ नगराध्यक्ष ठरवणार नाही, तर ‘पतीछत्राखालील महिला राजकारणाला जनता नकार देते का?’ याचे उत्तरही देईल.

वर्धा जिल्ह्यातील नगर परिषद निवडणुकांसाठी तब्बल ३१० इच्छुकांचे अर्ज दाखल

प्रतिनिधी सचिन वाघे

वर्धा :-आगामी नगरपालिका सार्वत्रिक निवडणुकांच्या पार्श्वभूमीवर वर्धा जिल्ह्यात राष्ट्रवादी काँग्रेस शरदचंद्र पवार पक्षाकडून उमेदवारीसाठी कार्यकर्त्यांमध्ये मोठा उत्साह पाहायला मिळत आहे. स्थानिक स्वराज्य संस्थांमध्ये पक्षाचा प्रभाव वाढवण्यासाठी आणि जनतेच्या विकासासाठी काम करण्याची संधी मिळावी या उद्देशाने तब्बल ३१० इच्छुकांनी अधिकृतपणे आपले अर्ज पक्षाकडे दाखल केले आहेत.

वर्धा, हिंगणघाट, आर्वी, देवळी, कारंजा, पुलगाव, सेलू, सिंदी रेल्वे आणि समुद्रपूर या नगर परिषदांमध्ये इच्छुकांची चुरस वाढली आहे. अनेक नव्या चेहऱ्यांनी राजकारणात पदार्पणाची तयारी दाखवली असून, अनुभवी माजी नगरसेवक आणि समाजसेवकांनीही पुन्हा एकदा निवडणूक रिंगणात उतरण्याची इच्छा व्यक्त केली आहे.

त्यामुळे उमेदवार निवडीची प्रक्रिया उत्साहवर्धक आणि स्पर्धात्मक ठरणार असल्याचे जिल्हाध्यक्ष अतुल वांदिले यांनी सांगितले.

प्राप्त अर्जांची लवकरच छाननी करण्यात येणार असून, स्वच्छ प्रतिमा, जनतेसाठी काम करण्याची वृत्ती आणि विकासाभिमुख विचारसरणी या निकषांवर उमेदवार निश्चित केले जातील. उमेदवार निवडीचा अंतिम निर्णय स्थानिक नेतृत्व आणि जिल्हा पातळीवरील समन्वय समितीच्या बैठकीनंतर घेण्यात येईल.

अतुल वांदिले म्हणाले, “जनतेच्या विकासाचा विचार, स्वच्छ प्रशासन आणि प्रामाणिक सेवा या तत्वांवर आमचा पक्ष ठाम आहे. कार्यकर्त्यांचा प्रचंड उत्साह आणि जनतेचा उत्तम प्रतिसाद पाहता, आगामी निवडणुकांमध्ये राष्ट्रवादी काँग्रेस शरदचंद्र पवार पक्षाची स्थिती वर्धा जिल्ह्यात अधिक मजबूत होईल.”
त्यांनी पुढे सांगितले की, पक्षाचे कार्यकर्ते गेल्या काही वर्षांपासून जनतेशी थेट संपर्कात राहून काम करत आहेत.

Sharadpawar/स्थानिक विकास, महिला सक्षमीकरण, रोजगारनिर्मिती आणि पारदर्शक प्रशासन या मुद्द्यांवर पक्ष जनतेचा विश्वास संपादन करत आहे. सध्या सर्व नगर परिषदांमध्ये निवडणुकीचा माहोल रंगू लागला असून, उमेदवारांची घोषणा होताच प्रचार मोहीमेला वेग येईल, अशी अपेक्षा व्यक्त करण्यात आली आहे.