यावल प्रतिनिधी विकी। वानखेडे

तालुक्यातील चुंचाळे गावात राहणाऱ्या एका तरुणाने गळफास लावून आत्महत्या केल्याची घटना घडली आहे. याप्रकरणी यावल पोलिसात अकस्मात मृत्युची नोंद करण्यात आली आहे.

याबाबत अधिक माहिती अशी की, असलम सायबु तडवी (वय३०) असे मृत तरुणाचे नाव असून असलम याने आज (दि.१४) रोजी सकाळी १० ते १०:३० वाजेच्या सुमारास आत्महत्या केल्याची घटना घडली आहे. घरातील इतर सदस्य बसले असता तडवी यांचा सहा वर्षाचा आशु नावाचा मुलगा हा घरात आपल्या वडीलांना पाहण्यासाठी गेला असता हा सर्व प्रकार उघडकीस आला. असलम यांना तात्काळ खाली उतरवले असून उपचारासाठी जळगाव येथे घेवुन जात असतांना वाहन जळगाव शहरात पोहोचताच त्या तरूणास मृत्युने गाठले व त्यांची प्राणज्योत मावळली. मयत तरूण असलम तडवी हा मोल मजुरी करून आपल्या कुटुंबाचा उदरर्निवाह करीत होता. त्यास दारूचे व्यसन असल्याचे वृत्त आहे. मयत तडवी याच्या मृतदेहावर जळगाव येथील सामान्य रुग्णालयात शवविच्छेदन करण्यात आले आहे.

उषा पानसरे असदपूर

अमरावती १३ जानेवारी कोरोनाचे संक्रमण वाढत असल्याने राज्य सरकारने खबरदारीचा उपाय म्हणून आवश्यक निर्बंध लावण्यात आले असून गर्दी टाळण्याचे आवाहन केले आहे. त्यामुळे केवळ महाराष्ट्राचं नाही तर देशभरातील एक अभूतपूर्व जयंती उत्सव म्हणून साजरा होणाऱ्या सिंदखेड राजा येथील मातृतीर्थावरील माँ साहेब राजमाता जिजाऊ उत्सव सोहळा मोजक्याच लोकांच्या उपस्थितीत साध्या पद्धतीने साजरा करण्यात आला असला तरी अमरावती मधील जिजाऊ चौकातील मानवंदना कार्यक्रमाचा नजारा हा मातृतीर्थावरील जिजाऊ सृष्टीप्रमाणेच भासत असल्याचे मनोगत आ. सौ . सुलभाताई खोडके यांनी व्यक्त केले . बुधवार दिनांक १२ जानेवारी रोजी राजमाता जिजाऊ यांच्या ४२४ व्या जन्मोत्सवानिमित्त मराठा सेवा संघ , संभाजी ब्रिगेड, जिजाऊ ब्रिगेड च्या वतीने स्थानिक आरटीओ चौक स्थित जिजाऊ स्मारक परिसरात आयोजित मानवंदना कार्यक्रमाप्रसंगी त्या बोलत होत्या .
कोरोना पार्श्वभूमीवर अतिशय साध्या पध्दतीने जिजाऊ जन्मोत्सवाचे आयोजन करण्यात आले होते. सर्वप्रथम प्रकल्प संचालक,ग्रामीण विकास यंत्रणा,अमरावती शिवमती प्रितीताई देशमुख ( चौधरी) यांच्या हस्ते हारार्पण करण्यात आले. तसेच सामूहिक जिजाऊ वंदना गाऊन अभिवादन केल्या गेले. सर्वसामान्य जनतेचे, रयतेचे, लोक कल्याणकारी राज्य निर्माण करण्यासाठी लढा देणाऱ्या जिजाऊ माँ साहेब यांचे १२ जानेवारी जयंती दिनी जिजाऊ च्या प्रेरणादायी जीवनकार्याचीही उपस्थितांना माहिती देण्यात आली. जनतेच्या उद्धाराकरिता, राजसत्ता मिळविण्यासाठी, शोषित, पीडित समाजाला न्याय देण्याकरिता जिजाऊंनी आपले संपूर्ण आयुष्य खर्ची घातले. सर्व जाती धर्मातील लोकांना प्रशासनात सहभागी करून त्यांच्या जीवनात क्रांती घडविली. म्हणूनच त्या राजमाता, राष्ट्रमाता ठरल्या. जिजाऊंच्या आणि छत्रपती शिवाजी महाराजांच्या काळात स्त्रियांचा प्रचंड आदर व सन्मान केला गेला. स्वातंत्र्य, समता, बंधुता, आणि न्याय ह्या तत्वांवर आधारीत व्यवस्था व राज्य त्यांनी निर्माण केले. शिवरायांमध्ये ही मूल्य रुजविली आणि याचाच वापर करून शिवरायांचे , रयतेचे कल्याणकारी राज्य निर्माण केले.म्हणूनच त्यांचा उल्लेख लोककल्याणकारी राष्ट्रमाता जिजाऊ करणे योग्य ठरतो. या शब्दात आमदार सौ सुलभाताई खोडके यांनी त्यांना मनाचा मुजरा अर्पण केला . दरम्यान या प्रसंगी मराठा सेवा संघाचे जिल्हाध्यक्ष अश्विन चौधरी यांनी आमदार सुलभाताई खोडके यांना जिजाऊ स्मारक विकास आराखडा सादर केला. यावेळी आमदार सुलभाताई खोडके यांनी जिजाऊ जन्मोत्सवाच्या शुभेच्छा देत नुकताच वरुड येथे झालेल्या जिजाऊ ब्रिगेडच्या जिल्हास्तरीय अधिवेशना प्रमाणेच अमरावती शहरामध्ये सुद्धा विदर्भस्तरीय अधिवेशन व्हावे व त्याकरीता आपले पूर्ण सहकार्य राहील असा मानस सुद्धा आमदार महोदयांनी व्यक्त केला . याप्रसंगी मराठा सेवा संघ जिल्हाध्यक्ष शिवश्री आश्विन चौधरी, प्रवक्ते चंद्रकांत मोहिते ,सिंधू संस्थेचे प्रदेश अध्यक्ष शिवश्री प्रफुल्ल गुडधे ,जिजाऊ ब्रिगेड महानगर अध्यक्षा शिवमती हर्षा ढोक यांनीही जिजाऊ माँ साहेब यांच्या जीवनावर प्रकाश टाकला. राजमाता जिजाऊ माँ साहेब जयंती विशेष प्रसंगी ॲड. आशिषजी हाडके व शिवमती वर्षा धाबे यांचे संकलन, संपादन, लेखन असलेल्या सांस्कृतिक कक्ष व्यवस्थापन व कार्यपद्धती नामक मार्गदर्शक पुस्तिकेचे यावेळी प्रकाशन करण्यात आले. छत्रपती शिवाजी महाराज यांना ज्ञान , चातुर्य, चारित्र्य, संघटन व पराक्रम अशा राजस व सत्वगुणांचे बाळकडू देणाऱ्या राजमाता जिजाऊ जयंतीनिमित्त सर्वांचे वतीने यावेळी उपस्थितांचे वतीने अभिवादन करण्यात आले त्यामध्ये प्रामुख्याने मराठा सेवा संघ प्रदेश उपाध्यक्ष शिवश्री अरविंद गावंडे, जिल्हाध्यक्ष जिजाऊ ब्रिगेड शिवमती मनाली तायडे, शिवमती किर्तीमाला चौधरी, शिवमती शिला पाटील , शिवमती प्रा . शोभना देशमुख, शिवश्री चंद्रकांत मोहिते , अश्विन चौधरी, यश खोडके , नगरसेविका सुरेखा लुंगारे , अंजली चौधरी, भाग्यश्री मोहिते ,प्राचार्य डॉ . अंजली ठाकरे ,यांच्यासह , जिजाऊ ब्रिगेड, संभाजी ब्रिगेड, वीर भगतसिंग विद्यार्थी परिषद, मराठा उद्योजक कक्ष, संगीतसूर्य केशवराव भोसले सांस्कृतिक परिषद, शिक्षण महर्षी डॉ. पंजाबराव देशमुख शिक्षक परिषद व समस्त ३३ कक्ष संघटनेतील कार्यकर्ते व पदाधिकारी प्रामुख्याने उपस्थित होते. तुमचं आमच नात काय जय जिजाऊ- जय शिवराय, यासोबतच रक्ता रक्तात भिनलय काय- जय जिजाऊ – जय शिवराय चा एकच जयघोष करण्यात आला.

शेगाव प्रतिनिधी अर्जुन कराळे

शेगाव तालुक्यात आता ऑनलाईन शिकवणी
गटविकास अधिकारी सतिष देशमुख यांचे आदेश

शेगाव :शाळा बंद असल्यामुळे, विद्यार्थ्यांचे शैक्षणिक नुकसान टाळण्यासाठी पंचायत समिती अंतर्गत सर्व शिक्षकांना नियमीतपणे वर्गात फळयावर शिकवून त्याचे ऑनलाईन मोवाईलव्दारे सर्व विद्यार्थ्यांपर्यंत प्रसारण करण्याच्या सुचना  गटविकास अधिकारी सतिष देशमुख यांनी दिल्या आहेत.
जिल्हाधिकारी तथा अध्यक्ष जिल्हा आपत्ती व्यवस्थापन प्राधिकरण बुलढाणा यांचे आदेश क्रमांक गृहविभाग कक्ष -4-2- कावि/13/2022 दिनांक 9/1/2022 नुसार वाढत्या कोविड प्रार्दुभावामुळे तालुक्या अंतर्गत सर्व शाळा दिनांक 10/1/22 पासुन विद्यार्थ्याकरीता बंद करण्यात आलेल्या आहेत. त्यामुळे विद्यार्थ्यांचे शैक्षणिक नुकसान टाळण्यासाठी ऑनलाईन शिकवणी नियमित सुरू ठेवण्याचे दृष्टीने सुचना करण्यात आली आहे.
तरी सर्व पालकानी आपले पाल्यास मोवाईलची सुवीधा उपलब्ध करुन दयावी. मोबाईलची सुवीधा उपलब्ध होत नसल्यास ज्यांचेकडे मोवाईल उपलब्ध आहे अश्याठिकाणी कोवीड नियमाचे पालन करुन, दोन किंवा तिन पाल्यास एकत्र वसवून तशा प्रकारे ऑनलाईन शिक्षणाचा लाभ घेण्याच्या दृष्टीने प्रयत्न करावे.विद्यार्थी व पालक यांचेसुध्दा सहकार्य अपेक्षीत आहे.असेही आवाहन पं स चे गटविकास अधिकारी सतिष देशमुख यांनी केले आहे.

डॉ. आंबेडकर महाविद्यालय येथे पदवी वितरण समारंभ

(चंद्रपूर घुग्घुस )प्रतिनिधी
रमेश सुध्दाला

डॉ. बाबासाहेब आंबेडकर यांनी दिक्षा दिलेल्या पवित्र भुमितून भविष्यातील अधिकारी वर्ग घडत आहे. शिक्षणासाठी पूरक असे वातावरण या शिक्षण संस्थेच्या वतीने निर्माण करण्यात आले आहे. याचाच प्रत्यय आज पदवी वितरण कार्यक्रमात पून्हा एकदा आला असून आज पदवी प्राप्त झालेल्या विद्यार्थ्यांनी उद्या देशसेवेसह त्यांना या महाविद्यालयातून मिळालेला समाजसेवेचा वसा पूढे नेत समाजसेवत अग्रेसर राहून देश घडवावा असे प्रतीपादन आमदार किशोर जोरगेवार यांनी केले. सोबतच येथे शिक्षणासाठी येणाऱ्या विद्यार्थ्यांना उत्तम शिक्षण घेता यावे या करिता आपण येथील अभ्यासीकेसाठी 50 लक्ष रुपये देणार असल्याची घोषणाही आमदार किशोर जोरगेवार यांनी केली.
डॉ. बाबासाहेब आंबेडकर मेमोरियल सोसायटी, चंद्रपूर द्वारा संचालीत डॉ. आंबेडकर कला, वाणिज्य व विज्ञान महाविद्यालय गोंडवाना विद्यापीठ गडचिरोली अंतर्गत सत्र 2020 – 21 पदवी प्रमाणपत्र वितरण तथा गुणवत्ता प्राप्त विद्यार्थी सत्कार समारंभाचे आयोजन डॉ. आंबेडकर महाविद्यालयात करण्यात आले होते. या कार्यक्रमात ते बोलत होते. यावेळी डॉ. बाबासाहेब आंबेडकर मेमोरियल सोसायटी, दिक्षाभुमी चंद्रपूरचे सहसचिव कुणाल घोटेकर, डॉ. बाबासाहेब आंबेडकर मेमोरियल सोसायटी, दिक्षाभुमी चंद्रपूरचे सदस्य राहुल घोटेकर, प्राचार्य डॉ. राजेश दहेगांवकर आदि मान्यवरांची मंचावर उपस्थिती होती.
यावेळी पूढे बोलतांना आ. जोरगेवार म्हणाले कि, चंद्रपूरातील विद्यार्थी शिक्षण क्षेत्रात आपले आणि आपल्या जिल्ह्याचे नाव लौकीक करत आहे. यु.पी.एस.सी. मध्येही चंद्रपूरच्या चार विद्यार्थ्यांनी उत्तीर्ण होत चंद्रपूर जिल्ह्याचे नाव देश पातळीवर उंचावले आहे. शिक्षणाच्या कमी संसाधनातही हे विद्यार्थी प्रामाणीकतेने प्रयत्न करत यश संपादीत करत आहे. आपणही विद्यार्थ्यांना चांगले शिक्षण मिळावे याकरिता प्रयत्न करत आहोत. याचाच एक भाग म्हणून मतदार संघात सर्व सोयी सुविधायुक्त 11 अभ्यासीका साकारण्याचा संकल्प केला आहे. यातील पाच अभ्यासिकांचे काम युध्द पातळीवर सुरु असल्याचे ते यावेळी म्हणाले,
गेल्या दोन वर्षापासून कोरोनाच्या प्रादुर्भावामूळे दिक्षांत समारंभ हा घेण्यात आलेला नव्हता मात्र आज हा कार्यक्रम संपन्न होत आहे. आता महाविद्यालयातून पदवी प्राप्त विद्यार्थी पदवी घेऊन विविध क्षेत्रात नौकरीकरिता बाहेर पडतील. विविध क्षेत्रात कार्य करत असतांना त्यांनी समाजाच्याही हितासाठी कार्य करावे, कारण आजचा युवा हाच या देशाच्या उत्तम परिवर्तनाला साधक असल्याचे ते यावेळी म्हणाले. डॉ. आंबेडकर महाविद्यालयातील विद्यार्थ्यानाही आवश्यक त्या सर्व पुस्तकांचे वाचण करता यावे ते पुस्तके त्यांना सहज उपलब्ध व्हावीत या करिता आपण या महाविद्यालयाला अभ्यासीका तयार करण्यासाठी 50 लक्ष रुपये निधी देणार असल्याचेही ते यावेळी म्हणाले. या निधीतून महाविद्यालय व्यवस्थापण उत्तम अभ्यासीका तयार करतील अशी आशाही यावेळी त्यांनी व्यक्त केली. या दिक्षांत कार्यक्रमात पदविप्राप्त विद्यार्थ्यांना मान्यवरांच्या हस्ते पदवीचे वितरण करण्यात आले तसेच यावेळी गुणवत्ता प्राप्त विद्यार्थ्यांच्या या कार्यक्रमात सत्कारही करण्यात आला. सदर कार्यक्रमाला पदविप्राप्त आणि गुणवत्ता प्राप्त विद्यार्थ्यांची मोठ्या संख्येने उपस्थिती होती.