गेल्या आठवडाभरापेक्षा अधिक कालावधीपासून आमच्या स्वाभिमानी शेतकरी संघटनेचे युवा नेते राणा चंद्रशेखर चंदन मृत्यूशी झुंज देत आहेत. त्यांच्यावर औरंगाबाद येथील सिग्मा हॉस्पीटलमध्ये तज्ञ डॉक्टरांच्या टिमकडून उपचार सुरु आहेत.. त्यांच्या या
उपचाराचा खर्च कितीही असला तरीही ‘स्वाभिमानी परिवार’ राणा चंदन यांच्या पाठीशी खंबीरपणे उभा आहे. परंतु राणांच्या या आजारपणात काही जण सहानुभूतिच्या नावाखाली प्रसिद्धीचा स्टंट करीत आहेत. राणा चंदन हे गेल्या 10 वर्षांपासून संघटनेत काम करीत आहे. राणा यांच्या अंगी स्वाभिमानी बाणा आहे.. तोच बाणा त्यांच्या परिवारानेही जपला आहे. स्वाभिमानाने आणि ताठ मानेने जगणाऱ्या चंदन परिवाराने कुणासमोर कधी हात पसरले नाहीत. कारण आमचे नेते राजूजी शेट्टी व रविकांतजी तुपकर हे राणा चंदन आणि त्यांच्या परिवाराच्या पाठीशी खंबीरपणे उभे आहेत. ‘राणा चंदन पुन्हा तंदुरूस्त झाले पाहीजे, यासाठी पैशांचा डोंगर उभा करण्याची गरज पडली तरी करू’, या भूमिकेतून रविकांतजी औरंगाबादेत तळ ठोकून आहेत.
मात्र काही नेते राणा चंदन यांना तुटपूंजी आर्थिक मदत देत त्याचा गवगवा करीत आहेत. ‘बोटभर मदत आणि हातभर प्रसिद्धी’, करून आपल्या ओंगळवाण्या स्वभावाचे दर्शन लोकांना घडवित आहेत. संघटनेने किंवा राणा चंदन यांच्या परिवाराने आतापर्यंतही मदतीचे आवाहन केलेले नाही, तरीही काहींनी बळजबरीने मदत तर दिलीच परंतु त्याची सोशल मिडीयावर प्रसिद्धीही केली.. भारतीय संस्कृतिमध्ये दानाला महत्व आहे आणि सोबतच हे तत्वही आहे की,दुःखाच्या काळात उजव्या हाताने केलेले दान, डाव्या हातालाही कळू नये… पण मदत करणाऱ्या काही महाभागांनी आपल्या मदतीची विकृतपणे प्रसिद्धी केली. हा प्रकार अत्यंत किळसवाणा आणि राणा चंदन यांच्या परिवाराच्या स्वाभिमानाला धक्का पोहोचविणारा आहे…
जिल्ह्याचे पालकमंत्री ना. डॉ. राजेंद्र शिंगणे साहेबांनी राणा यांना भेट दिली, कुटूंबाला दिलासा दिला आणि मदतही केली, परंतु साहेबांनी या मदतीचा कुठलाही गाजावाजा केला नाही. डॉ. शिंगणे साहेबांचा हा आदर्श इतर नेत्यांनी जपला पाहीजे.. कुणाच्या गरिबीचा गैरफायदा घेवून स्वतःच्या राजकीय पोळ्या भाजणे बंद करावे, अशा भावना जनतेमधून व्यक्त होत आहेत. राणा चंदन यांच्याविषयीची आपुलकी हा भाग वेगळा.. त्यांना भेटायला जाणे हे ही ठिक, मदत करणे हे पण स्वीकारार्ह परंतु केलेल्या मदतीचे ओंगाळवाणे प्रदर्शन करणे कितपत योग्य ? याचे आत्मपरीक्षण संबंधितांनी केले पाहीजे. मदत देतांनाच्या उपकारी फोटोसेशनचा आणि स्टंटबाजीचा निषेध करावा तेव्हढा कमी…!
जर हा प्रकार थांबविला नाही तर जे असला विकृतपणा करीत आहेत, त्यांना त्यांची मदत साभार पोहोचविली जाईल, असा पवित्रा संघटनेने घेतला आहे. सर्वांनी एक लक्षात ठेवावे की, रविकांतजी तुपकर कार्यकर्त्याला बळ आणि पाठबळ देणारा नेता आमच्याकडे आहे.. आमच्या स्वाभिमानाचा सन्मान राखावा आणि राणा चंदन यांना केवळ दुवा द्यावी, दवाची व्यवस्था आम्ही केली आहे. ही विनंती.
आपला – प्रदीप शेळके (स्वा.शे.सं. बुलडाणा)
