ॲड. शीतल चव्हाण फाउंडेशनचे मुख्याधिकाऱ्यांना निवेदन
—————

सूर्या मराठी न्यूज ऋषिकेश सुरवसे

उमरगा : उमरगा नगर परिषदेसाठी काम करणाऱ्या महिला स्वच्छता कर्मचाऱ्यांच्या पगार, PF कपात आणि देयक प्रक्रियेमध्ये गंभीर अनियमितता होत असल्याचा आरोप करत या प्रकरणाची तात्काळ चौकशी करून संबंधित महिला कर्मचाऱ्यांना न्याय द्यावा, अशी मागणी ॲड. शीतल चव्हाण फाउंडेशन, उमरगा यांच्या वतीने निवेदन द्वारे करण्यात आली आहे. याबाबतचे निवेदन नगर परिषद उमरगा येथील मुख्याधिकारी यांना देण्यात आले.

निवेदनात म्हटले आहे की, उमरगा शहराची स्वच्छता व्यवस्था सुरळीत ठेवण्यासाठी दररोज कठोर परिश्रम करणाऱ्या महिला स्वच्छता कर्मचाऱ्यांना महिन्याकाठी केवळ रु.६२९०/- इतकाच मोबदला दिला जात असल्याची माहिती समोर येत आहे. विशेष म्हणजे हा पगार बँक खात्यात न देता रोखीने (बाय हँड) दिला जात असल्याचेही सांगण्यात आले आहे.
याहून गंभीर बाब म्हणजे या महिला कर्मचाऱ्यांच्या पगारातून दरमहा अंदाजे रु. १४०० ते १७०० पर्यंत भविष्यनिर्वाह निधी (PF) कपात केली जाते. मात्र हा PF संबंधित कर्मचाऱ्यांच्या खात्यावर नियमितपणे जमा होत आहे की नाही, याबाबत संशय व्यक्त करण्यात आला आहे.

तसेच या महिला कर्मचाऱ्यांसाठी बँकेत खाती उघडण्यात आली असली, तरी त्यांची पासबुक त्यांच्या ताब्यात देण्यात आलेली नाहीत, अशीही तक्रार करण्यात आली आहे. काही ठिकाणी वर्षभरातील सह्या एकत्रितपणे पे-स्लिपवर घेऊन काही त्रयस्थ व्यक्ती पगार उचलतात आणि त्यातील केवळ रु.६२९०/- इतकीच रक्कम महिला कर्मचाऱ्यांना दिली जाते, अशीही गंभीर बाब निवेदनात नमूद करण्यात आली आहे.
या प्रकरणाबाबत आवाज उठवला किंवा तक्रार केली तर नोकरीवरून काढून टाकण्याची भीती दाखवली जाते, अशा दबावाखाली या महिला काम करत असल्याचा आरोपही करण्यात आला आहे.

या पार्श्वभूमीवर नगर परिषद प्रशासनाने पुढील बाबींची तात्काळ चौकशी करावी, अशी मागणी करण्यात आली आहे :

(1) महिला स्वच्छता कर्मचाऱ्यांच्या पगार व PF कपातीची सखोल चौकशी करावी.

(2) कपात करण्यात आलेला PF संबंधित कर्मचाऱ्यांच्या खात्यावर जमा झाला आहे की नाही याची खात्री करून त्याची लेखी माहिती द्यावी.

(3) सर्व कर्मचाऱ्यांचे पगार थेट त्यांच्या बँक खात्यात (DBT) जमा करण्याची व्यवस्था करावी.

(4) संबंधित महिला कर्मचाऱ्यांना त्यांची बँक पासबुक व कागदपत्रे त्यांच्या ताब्यात द्यावीत.

(5) आर्थिक अनियमितता आढळल्यास संबंधित जबाबदार व्यक्तींवर प्रशासकीय व कायदेशीर कारवाई करावी.
उमरगा शहर स्वच्छ ठेवण्यासाठी परिश्रम करणाऱ्या महिला स्वच्छता कर्मचाऱ्यांना न्याय्य मोबदला, पारदर्शक पगार प्रणाली आणि सुरक्षित कामाचे वातावरण मिळणे ही प्रशासनाची जबाबदारी आहे, असे निवेदनात नमूद करण्यात आले आहे.

Dharashivnews /या निवेदनावर सत्यनारायण जाधव, व्यंकट भालेराव, राजू बटगिरे, करीम शेख, ज्योती माने, संतोष चव्हाण, बबिता मदने, शबाना उडचणे, किशोर बसगुंडे, ऍड. ख्वाजा शेख, ऍड. अर्चना जाधव, कविता साळी, सीमा कांबळे, विमल वजनमकर, छबाबाई सुरवसे, ठकूबाई कांबळे, अश्विनी सौंदर्गे, मीना येरसन, लक्ष्मी कांबळे, किरण भोसले यांच्या स्वाक्षऱ्या आहेत.