गोंदिया-शैलेश राजनकर

गोंदिया : जिल्ह्यात कोरोना रुग्णांची संख्या मध्यंतरी कमी झाली होती पण आता रुग्णांच्या संख्येत वाढ होत आहे.पण कोरोना योद्धा डॉक्टरांची चमू आपली जीवाची पर्वा न करता कोरोना बाधित रुग्णांची सेवा करत असतानाच शासकीय वैद्यकीय महाविद्यालयात बालरोग विभागामध्ये DCH या पदव्युत्तर शिक्षण सुरू असलेल्या ३७ वर्षीय तरुणी डॉ.रोहिणी गजभिये यांचा कोरोनामुळे शासकीय वैद्यकीय महाविद्यालयात उपचार सुरू असतांना दुर्दैवी मृत्यू झाला.डॉ.रोहिणीचा मृत्यू हा जिल्ह्यातील शासकीय वैद्यकीय सेवा देतांना कोरोना योद्धाचा पहिलाच बळी आहे.त्यामुळे शासकीय वैद्यकीय महाविद्यालयात सर्वत्र शोककळा पसरली आहे.डॉ.रोहिणी ही १३ नोव्हेंबर ला कोरोना पॉझिटिव्ह आल्या होत्या त्यांना उपचारासाठी शासकीय वैद्यकीय महाविद्यालयात उपचारासाठी दाखल करण्यात आले होते पण कोरोनाबधितांची दिवसरात्र सेवा करणारी खरी कोरोना योद्धा आपल्या आयुष्याची लढाई मात्र हरली आणि त्यांचा उपचारादरम्यान मृत्यू झाला.या खऱ्या कोरोना योद्धा डॉ.रोहिणी गजभिये यांना सुर्या मराठी परिवारा तर्फे भावपूर्ण श्रद्धांजली.
सर्वांनी कोरोना विषयक मार्गदर्शक सूचनांचे पालन करून आपले व आपल्या परिवाराचे कोरोना पासून रक्षण करावे.

गोंदिया-शैलेश राजनकर

गोंदिया,दि.16 – शहरापासून अवघ्या सहा किमी अंतरावर असलेल्या लोधीटोला (चुटीया) येथील पटले यांच्या शेतात कुजलेल्या अवस्थेत पट्टेदार वाघाचे अवशेष आढळले. हे वाघाचे शरीराचे तुकडे-तुकडे करून वेगवेगळ्या शेतात टाकण्यात आल्याचा प्रकार (दि.15) नोव्हेंबरच्या सायकांळला उघडकीस आला.लगेच त्याची माहिती वनविभागाला देण्यात आली. लोधीटोला येथील शेतकरी अमरनाथ पटले यांच्या शेतात पट्टेदार वाघाचा मृतदेह पडला असल्याची माहिती गावकऱ्यांनी शेतकरी पटले यांना रविवारी सायंकाळी दिली. त्यांनी ही माहिती वनािधकाऱ्यांना देईपर्यंत रात्र झाली होती. आज (दि.१६) रोजी वनाधिकारी व वन्यप्रेमी लोधीटोला येथील पटले यांच्या शेतात गेले असतांना त्या शेतात पट्टेदार वाघाचे अवशेष वेगवेगळ्या ठिकाणी आठळले. १२ ते १५ दिवसापूर्वी वाघाची शिकार करून त्या वाघाचे अवशेष शेतात टाकल्याने वाघाचा शरीर कुजलेल्या अवस्थेत होता. त्या वाघाच्या शरीराचे तुकडे-तुकडे शेतात वेगवेगळ्या ठिकाणी टाकण्यात आले होते. ते गोळा करण्यात आले. करंट लावून किंवा विष देऊन त्या वाघाची शिकार करण्यात आली असावी असा कयास लावला जात आहे. घटनास्थळावर उपवनसंरक्षक कुलराजसिंग, सहाय्यक उपवनसंरक्षक राजेंद्र सदगीर, आकरे, क्षेत्र सहाय्यक दखने वन्यजीवप्रेमी सावन बहेकार, मानद वन्यजीव रक्षक मुकूंद धुर्वे व पशूधन वैद्यकीय अधिकारी,डाॅ.विवेक गजरे,डाॅ.ए.डी.जवलकर यांनी मृत वाघाची तपासणी करुन शवविच्छेदन केल्यानंतर त्याच्यावर संस्कार करण्यात आला. आरोपींचा शोध वनविभाग घेत आहे.

सचिन पगारे
नांदगाव (नाशिक)

सोमवारी पाडव्याच्या मुहूर्तावर नांदगाव तालुक्यातील जातेगांव येथील श्री पिनाकेश्वर( मोठा महादेव ) देवस्थानचे अतिप्राचीन शिवमंदिर हे शासन आदेशावरून शिवभक्तांसाठी उघडण्यात आले. यामुळे शिवभक्तांमध्ये उत्साहाचे वातावरण तयार झाले आहे. मंदीर प्रवेश करताना शासनाने जाहीर केलेल्या विविध नियमांचे पालन करणे आवश्यक आहे, असे आवाहन देवस्थान ट्रस्टचे अध्यक्ष श्री ज्ञानेश्वर चव्हाण यांनी केले.
शासनाने पाडव्याच्या मुहूर्तावर सर्व प्रार्थनास्थळे उघडण्याचा निर्णय घेतल्यामुळे नांदगांव तालुक्यातील जातेगांवच्या उत्तरेला सातमाळा पर्वतरांगेत असलेले श्री क्षेत्र पिनाकेश्वर महादेव (मोठा महादेव) हे अतिप्राचीन देवस्थान शिवभक्तांसाठी उघडण्यात आले. कोरोना महामारीच्या पार्श्वभूमीवर गेल्या आठ महिन्यांपासून देवस्थान ट्रस्ट मार्फत हे मंदिर बंद ठेवून व भक्तांना प्रवेश बंद करुन अतिदक्षता घेण्यात आली होती .सोमवारी श्री पिनाकेश्वर महादेव मंदिराचा मुख्य दरवाजा व गर्भगृह दरवाजा मंदीर ट्रस्ट समितीने उघडून संपूर्ण मंदिर परिसरात निर्जंतुकिकरण केले त्यामुळे शिवभक्तांमध्ये समाधानाचे चे वातावरण तयार झाले आहे. शिवभक्तांनी मंदिर प्रवेश करताना हर हर महादेवाचा जयघोष करत आनंद व्यक्त केला . मात्र मंदीर प्रवेश करताना विविध नियमांचे काटेकोरपणे पालन करण्याचे आवाहन करण्यात आले आहे. या बाबत श्री पिनाकेश्वर महादेव मंदिर ट्रस्टचे अध्यक्ष श्री ज्ञानेश्वर चव्हाण यांनी सांगितले की, शासन आदेशान्वये हे मंदिर जनतेसाठी खुले करण्यात आले असले तरी विविध नियमांचे पालन करणे आवश्यक आहे. मंदीर प्रवेश करताना मास्कचा वापर करणे, सामाजिक अंतर ठेवणे , मंदिर परिसर, सभामंडप ,गर्भगृहात मूर्तींना स्पर्श न करणे , प्रसाद वाटप न करणे आदी नियमांचे पालन भक्तांनी करणे आवश्यक आहे.अशा विविध नियमांचे पालन करुन सहकार्य करण्याचे आवाहन मंदीर ट्रस्ट मार्फत करण्यात आले आहे. यावेळी पिनाकेश्वर देवस्थानचे अध्यक्ष श्री ज्ञानेश्वर चव्हाण, सुरक्षारक्षक आकाश खिरडकर, संतोष खिरडकर , ग्रामस्थ आदी उपस्थित होते .